سميرة عبدالعزيز تكشف عن موقف طريف تعرَّضت له بسبب "أم كلثوم"

روت الفنان المصرية سميرة عبدالعزيز موقفا طريفا حدث معها أثناء زيارتها للمدينة التي نشأت فيها أم كلثوم، لمناسبة تقديمها دور والدتها في المسلسل الشهير "أم كلثوم" للفنانة صابرين، وقالت: "كنت سعيدة جدا بمسلسل أم كلثوم، لإني كنت من عشاقها، ومنذ صغري والدي كان بيقعدني أنا وإخواتي علشان نسمع أم كلثوم واللي كان بيقوم كان بيضرب، ومن صغري مفوتش حفلة ليها".
وأضافت: "لما قالولي إني أجسد دور والدة أم كلثوم، سمعت كل الشرائط اللي اتسجلت بصوتها لبرنامج صوت العرب مع وجدي الحكيم، واللي اتكلمت فيه عن أسرتها وبدايتها، علشان أجسد ده ويطلع صادق ويعلم مع الناس، والحمد لله أول يوم إذاعة كلمتني بنت أختها، قالتلي أنا شفت ستي فاطمة (جدة أم كلثوم الحقيقية)".
وتابعت: "عملولنا ندوة في بلد أم كلثوم، أول ما دخلنا أوضة المحافظ، في فلاح جالي جري، ومسك ركبتي وقالي: (يا ست فاطمة يخلصك أبقى أنا مش لاقي شغل، كلمي المحافظ عشاني)، وأنا أقوله أنا مش فاطمة أنا ممثلة، وده من كتر المصداقية وهذا فضل من الله"، وعن إسناد دور الأم في بعض الأعمال الفنية لفنانات صغيرات في السن، قالت عبد العزيز: "في أمهات صغيرين وحياتنا مليانة بيهم فعلًا، بس أنا دايما بنصحهم وأقولهم يا حبايبي، افتكري أمك وشوفي كانت بتعمل إيه واعملي زيها، هتلاقي نفسك بتأدي صح، إنما متعمليش أم مستهترة أو أم مش بتشوف أولادها، الأم يجب أن تكون نموذج محترم"، وعن السوشيال ميديا، ودرجة إجادتها لمنصاتها، قالت: "أنا ضعيفة في السوشيال ميديا، مش بعرف إلا الواتس آب بس، لإنهم بيبعتولي عليه"، وعن النصائح التي تقدمها لأحفادها بشأن انتقاء الأعمال الفنية التي يشاهدونها، قالت الفنانة: "أنا بخلي أحفادي يتفرجوا على حاجات معينة، قولتلهم لازم يتفرجوا على مسلسل الاختيار".
وأكملت: "كنت بطلب منهم قبل ما ياكلوا إنهم يفتحوا التلفزيون علشان يشوفوا رجالة مصر عملوا إيه، فبنصحهم علطول لو في أي حاجة كويسة لازم يشوفوها، وخدتهم فيلم الممر علشان يتفرجوا عليه".
وعن أزمة فيروس كورونا، اختتمت: "في فترة الكورونا كنت قاعدة في البيت، ولو خرجت بلبس الكمامة وبراعي التعليمات اللي هما بيقولونا عليها".

قد يهمك ايضا:

سميرة عبدالعزيز تكشف تفاصيل دورها فى «القمر فى آخر الدنيا»

سميرة تُؤكد أنّ العمل مع صبحي من أروع ما يكون